SINGARAJAFM,-Songket inggih punika kain sané malakar saking kain tenun tradisional sané soang-soang daérah madué cecirén miwah corak ipuné soang-soang. Ring Bali wénten makudang-kudang genah makarya kain songket, silih tunggilnyané Buleleng. Pola miwah motif sané mauwah taler akeh inovasi nyabran warsa nganutin kawéntenan pasar sané nyansan nglimbak miwah sumber daya manusa sané nyansan nincap.
Désa Jinengdalem inggih punika
silih tunggil genah ring Bali sané wénten krama sané makarya kain songket.
Ngantos mangkin wénten kirang langkung 100 pengrajin kain songket khas
Jinengdalem sané kantun ngamargiang aktivitas ngaryanin miwah ngadol kain
songket punika.
Kerajinan kain tenun songket
puniki sampun saking ngunji ipun yadiastun ngranjing kerajinan tradisional.
Wangun kain songket Jinengdalem madué cecirén khas sané nganggén pewarna alami
ring proses pewarna kain songketnyané. Minakadi nganggén don jati, kulit taru
poh, miwah kunyit. Songket Jinengdalem kantun nganggén cara tradisional ring
makarya songketnyané inggih punika nganggén cag cag pinaka piranti utama ring
makarya songket.
Motif saking songket Jinengdalem
kantun nganggén motif lingsir sekadi motif patra sari, cakar ayam miwah
semanggi gunung, sakéwanten nganutin panglimbak fashion terus mauwah ring
aab modern. Kain songket mangkin nénten
ja wantah kaanggén pinaka kamben ring galah upacara kaagamaan kémanten, nanging
mangkin songket taler kaanggén pinaka silih tunggil daya tarik fashion. Mangkin
songket sampun dados busana antuk makudang-kudang modifikasi sané prasida
kaanggén pinaka panganggo utawi baju terusan, tas, perhiasan-perhiasan, sandal,
miwah sané tiosan
Songket khas Jinengdalem kaadol
antuk pangajinyane kirang langkung 3 yuta ngantos 6 yuta, antuk ukuran lantang
2 meter miwah linggah 1,1 meter. Yadiastun produk puniki sampun kakaryanin
saking dumun, sakéwanten nyantos mangkin para pengerajin kantun ngarepin
pikobet sekadi bahan baku benang sutra sané dados bahan utama makarya songket
endeknyané. Pangajin benang sutra sané terus nincap ngawinang para pengrajin
utaminnyané ring désa Jinengdalem manggihin pikobet. Akses pasar sané sayan
nglimbak miwah sayan akidik generasi muda sané malajah menenun dados silih
tunggil pikobet sajeroning ngalestariang kawéntenan kerajinan songket ring
jinengdalem.
0Komentar