SINGARAJAFM,-Sesampune 45 warsa nenten kemargiang, upacara mecaru suci ngangge Banteng selem Kemargiang malih ring Desa Bulian, Kecamatan Kubutambahan, Kabupaten Buleleng, nemonin ring rahina Tilem Kapitu, Anggara, (28/1/25). Tradisi puniki sampun kauripang malih pinaka pahan saking nglestariang tetamian leluhur miwah utsaha mangda prasida ngajegang keseimbangan ring jagate.
Upacara puniki kamargiang ring
pesimpangan Puser ring Desa Bulian, ring sor punyan beringin ageng sane
kapercayain dados pusat desa. Prosesi punika kakawitin antuk prosesi banteng
selem sane sampun kapayasin antuk piranti tradisional. Banteng puniki raris
kaarak-arak ngiterin desa Pulo Sekar (wasta sane lianan antuk Desa Bulian)
sadurung kaanggen piranti upakara. Manut kapercayaan umat Hindu Bali, sampi
selem malambangang Dewa Wisnu, dewa sane miara keseimbangan ring jagate,
inggian sekala (fisik) miwah niskala (spiritual).
Manggala upacara, Gede Suardana
maosang, upakara puniki kalaksanayang pinaka wentuk rasa suksmaning manah
majeng ring Ida Sang Hyang Widhi Wasa taler pinaka wentuk ngupapira bhuana
agung.
"Parikrama puniki
sepatutnyane kamargiang kirang langkung dasa warsa apisan, utawi nyabran warsa
yening prasida. Puniki pinaka pahan saking ngelestariang tradisi leluhur,"
baos dane
Selanturnyane, Suardana
ngawewehin, pemargi upakara ring Tilem Kapitu kapercaya prasida ngawetuang
keseimbangan lan ngerauhang merta majeng ring desa pakraman.
"Yening ritual puniki
presida kemargiang rutin, titiang mastikayang pacang ngerauhang kerukunan
(keselamatan) lan kestabilan ring alam semesta (tatanan dunia),"
tegesnyane
Upacara puniki taler kasarengin
olih Penglingsir Puri Agung Denpasar, Anak Agung Ngurah Wirabima, taler
Penglingsir Puri Mas Tebeng Pemecutan, Anak Agung Wisnu Murti. Kawentenan ipun
nyihnayang dukungan majeng ring krama Desa Bulian sajeroning ngalestariang
budaya leluhur.
Krama lokal ngaptiang antuk
nguripang malih upacara puniki, keseimbangan alam lan kerukunan desa prasida
katincapang.Lianan ring punika, dane
taler mapangapti mangda tradisi puniki tetep lestari lan katedunang majeng ring
generasi penerus.
0Komentar